BEUTELSPACUM

BEUTELSPACUM

German. Beutelspach, arx Germaniae vetus, in Suevia; condita, ut quidam volunt, ab Emerico I. Conestabili Clodovaei in pugna adversus Suevorum Regem Bandocarium commissa A. C. 499. ac a Rege Sueviae praefecto in his oris relicto, cui successisse dicunt Emericum II. Dagoberti Aulae Magistrum, Albertum Pippini Regis aulicum; huius filium Eberhardum, Caroli M. Magistrum aulae: cui duos assignant filios. Eberhardum Beutelspacensem, et Astulfum C. Calvensem, Leonis III. Pontif. patrem. Ab Eberhardo, quem Caroli Simplicis Aulae Magistrum faciunt, Emericus III. pater Ulrici Beutelsparcensis, prognatus dicitur. Ulrici huius ex filia Werntrude gener et haeres, Comes Wirtenbergicus Conradus fil. Alberti wirtenbergici ac Loewenstenii fuisse statuitut: Et mansit diu dominii Beutelspacensis titulus Wittenbergico coniunctus. Conrado filios aliqui Henricum ac Ulricum, Comites Wirtenbergicos ac Dominos Beutelspacenses, et Wernerum Comitem Groeningensem adscribunt. Alii Ulricum, Ebethardum et Henricum assignant: e quibus primus hodiernos Principes Wirtenbergicos severit. Vide Phil. iac. Spenerum Sylloge Geneal. Hist.